Sko, kart og ein liten bjørnesnutt!

Jajamen, jammen varer jula heilt til påske! Her ein dag kom nemlig ein stor pakke i posten. Frå Alfa! Med ikkje mindre enn TO par flunkande nye sko klare for å gå Noreg på langs. Ein kan nesten sjå på skoa at dei gler seg. Stor stas å få kunne begynne å gå inn skoa allereie nå.

Og, som om ikkje det var nok: ein tur heim til Kvinnherad gjorde underverk. Der venta nemleg fem kilo kart på oss. Me har vore så  heldige å få låne alle karta me treng av ein hyggelig kar frå kommunen med namn Geir Eidsvik som har gått Noreg på langs tidlegare. Verdien av tips frå ein så turvant kar som har gått turen før oss er uvurderleg.

Dei neste dagane vart derfor brukt til å fordjupe seg i kart og rute, samt googling av områder me skal gå gjennom. Det blir ein fryd å få oppleve så mange fine nye områder. Nasjonalparkane står i kø! Samtidig (som om me ikkje var klar over det frå før) er det ingen tvil om at det er ein lang tur som ligg føre oss. Finnmarksvidda kjem som første etappe i terreng, og med det som på karta ser ut som totalt fråver av både hytter og stiar, kan det heile verke litt overveldande. Eit eventyr blir det i alle fall!

Til sist: Medan Mari (den eldre) er redd for dårlege kne på langtur, har Martha stadig mareritt om gigantiske bjørnar som kjem for å angripe to systre på tur. Kanskje gjer denne videoen slutt på mareritta 😉